🌻 आनंदी पहाट 🌻

  🌻 आनंदी पहाट 🌻

                                            

            ⚜️⚜️🌾⚜️⚜️

           ग्रामीण लोकगीताची            

            ⚜️⚜️🕊️⚜️⚜️

                                                                                                                              

🌸🥀🌾🌺🎶🌺🌾🥀🌸

       भारतीय शेतकऱ्यांचे स्वतःचे असे पूर्वापार आनंदी विश्व आहे. निसर्ग सहवासात शेतात कष्ट करताना आपल्या सवंगड्यासह ते मजेने गाणे गातात.

        शेतकरी सकाळी एकटाच शेतात जात नाही तर आपल्या लाडक्या गाय.. वासरालाही सोबत नेतोय, कारण लहान मुलासारख्या त्याच्या मागे ते येतात. ही गाय-वासरु एवढी चपळ की नाचत बागडत तुरुतुरू चालणारी जणू हरिणीच. ती धावत निघालीय. शेतात मनसोक्त हिरवागार चाराही मिळतो. पहाट झाल्याने चिमण्या भुर्रकन उडत चारा शोधण्यासाठी जात आहेत.

        एकेकाळी शेतकरी दादाचे घर म्हणजे घरात किमान दहापंधरा माणसे. रोज नदीचे.. विहीरीचे पाणी आणून चुलीवरचा स्वयंपाक व्हायचा. मग सुनबाई पहाटेपासून राबराब राबून थकायची. पण घरातील सासू ती सासूच. सुनेकडून तिच्या अपेक्षा अवास्तव. ती तिच्या नावाने खडे फोडायचीच, कारण ती सून असताना यापेक्षाही जास्त माणसे घरात होती अन् यापेक्षाही जास्त कष्ट करायची.

        धुणे धुवायला गावातील सगळ्या विवाहित महिला नदीघाटावर जायच्या. तिथे गेल्या की प्रत्येकीची नजर गावात आलेल्या वाटसरूकडे मोठ्या अपेक्षेने असायची. त्यांना वाटायचे की, आपल्याला माहेरी न्यायला माहेरचा माणूस आलाय. अर्थात तो यायचा पण फक्त सणावारालाच.

        शेताच्या पाटात पाणी ओढून टाकणारे मोटकरी.. पाटकरी यांना तर विश्रांतीच नसायची. पण एकजण मात्र एकटाच हुरडा खात न्याहारी करीत बांधावर बसलाय.. अशी ही सारी गम्मत.

        ग्रामीण जीवनाचे एकेकाळचे ते खेडेगाव.. तेथील निसर्ग.. शेतातील मोट.. पिके.. गावातील वातावरण याचे सुंदर वर्णन करणारे गीतकार वामनराव कर्डक यांचे आकाशवाणीच्या 'कामगार सभा' कार्यक्रमातील हे गाजलेले गाणे.

        महाराष्ट्रात एक काळ  लोकसंगीतानी गाजवला. त्याकाळात सार्वजनिक कार्यक्रमात ही लोकगीते गाणारे रसिकांचे आवडते गायक म्हणजे श्रावण यशवंते. "ह्यो ह्यो ह्यो पाहुणा शकूचा मेहुणा.." यासारखी त्यांची अनेक गाणी गाजलीत. आज मुंबईत काळाचौकी येथे या लोकप्रिय गायकाच्या नावाने एक चौक आहे.

🌹🌾🌸🥀🕊️🥀🌸🌾🌹

  चल गं हरणी तुरूतुरू

  चिमण्या उडती भुरूभुरू

  भरभर पाय उचल चल

  रानमळ्याची वाट धरू

  हरणी माझी गुणी कशी

  मळ्यात येती रोज अशी

  मी पण देते तुला खावया

  हिरवा चारा पानभरू

  ही सुनबाई पहा तरी

  कष्ट बिचारी किती करी

  पहाटे पासून उसंत ना तरी

  सासूबाई करीते कुरूकुरू

  या गावातील सुहासिनी

  घाटावरती धुती धुणी

  आला म्हणती माझा मुऱ्हाळी

  दिसता कोणी वाटसरू

  मोटकरी या पाटकरी

  घ्या हो विसावा थोडातरी

  राव जराशी या चिलमीची

  झुरके मारा झुरूझुरू

  बसला वामन बांधावरी

  हुरड्यासंग न्याहारी करी

  कुणा न देतो एकटाच खातो

  तोंड काय चाललंय चुरूचुरू

  

🌹🎼🌹🌾🎶🌾🌹🎼🌹 

  

  गीत : वामनराव कर्डक   ✍

  संगीत : मधुकर पाठक  

  स्वर : श्रावण यशवंते

  

  🎼🎶🎼🎶🎼    🎧